爭奪香港金融地位

【珠玉在前】

左丁山

香港金融中心地位以前甚為穩固,自7月1日港區國安法生效之後,亞洲其他城市以為有機可乘,蠢蠢欲動,要搶香港金融中心地位,就算搶唔晒,亦搶去一部份,據外電輕描淡寫報道:新加坡、東京、首爾、台北都有同樣意思。

呢幾個城市之中,只有新加坡係最大威脅,東京憑日本經濟實力及1980年代風光,都有啲可能。台北完全唔駛睇,台北不是英語區,股市靠科技股(主要係台積電)支撐,金融法規落後,監管系統不合國際標準,加上北京不時有軍事威脅,國際金融機構幾難考慮台北開檔,首爾環境與台北差不多,英語不流行,有北韓軍事恐嚇,只勝在衍生工具盛行,稍為好過台北。

20200420005030
台北

新加坡就唔同嘞,英語還好過香港,同是普通法地區,加上居住環境好,高爾夫球場多,外國金融高層好鍾意,做東盟十國及印度生意方便過香港,而且商業租金比香港便宜呢。近半年不斷有大富豪家族之「家族辦公室(Home Office)」設在新加坡,有理由嘅,但新加坡政府上一次選舉雖然一如預期,保持不敗,但反對黨聲勢有所壯大,年青一代開始不再迷信李光耀模式,令李顯龍政府步步為營,加緊保護本地工人,外國人要取得工作簽證比以前難好多(因為要請唔到本地人先至准請外國人),更產生本地專才短缺,供不應求跡象,令外資要諗多一啲。

東京異軍突起,東京都知事小池百合子係NHK財經新聞主播出身,對金融事業有偏好,11月15日法新社報道,東京市政府於十月在香港設立辦事處,為考慮遷往東京的企業提供諮詢服務。小池百合子聲言希望東京成為亞洲第一金融大城市,願為港移到日本的金融企業提供臨時辦公室;又研究稅率降低,日本稅率高(45%),比香港(17%)及新加坡(22%)高出好多,令人望而卻步,但不可不知,金融事業首先注重搵銀第一,1980年代之東京,丸之內、銀袋、赤板區租金及餐廳貴到飛起,稅率高企,咪一樣吸引到大量外資!現在日經指數創30年新高,雖然與38,900點仍有距離,已從低位反彈,小池百合子可能指定大手町(Otemachi)做金融區,主攻資產管理,明顯就係睇住香港嚟做嘢!懂日文,又識金融嘅專才,有機會嘞。

shutterstock_1434371201
東京

【附錄】

越南的經驗:低調轉移

1975年,左丁山初入銀行,當年全世界大事,香港人印象最深刻的,可能是美軍退出南越,西貢失守,越共成立一個越南南方共和國,是年5月7日,越南南方共和國臨時革命政府在西貢(即現稱胡志明市)舉行慶祝集會,稍後就國有化所有南越銀行,發行新貨幣,1976年7月2日北越接收「南方共和國」,組成越南社會主義共和國,越南船民不斷流入本港及東南亞,原南越人民之銀行戶口存款,包括在美資銀行如萬國寶通(現稱花旗)、大通(現JP摩根大通)、美國銀行等等,皆蕩然無存。後來有海外南越富翁控告花旗,要求取回存款,結果只能取回在新加坡之銀行戶口存款(accounts domiciled in Singapore)。1970年代初,有大量東南亞人民在新加坡開設ACU(Asian Currency Unit,即亞洲美元)戶口,有啲親身去新加坡開戶口,有啲在當地美資銀行分行開戶口,詳細情況左丁山已唔記得清楚,當年仍然係trainee,唔到自己理,最記得嘅就係花旗承認所有在新加坡domicile嘅南越人戶口,美元存款可以取回。

0
1975年,北越軍進入南越的西貢後,一名北越軍人坐在著名西貢劇院門外休息。

想不到到了2020年,45年之後不少香港中產「湧美資行開離岸戶口,部份滙豐客過檔花旗」,不禁有啲悲從中來,唔通1975年面臨之南越回收銀行資產情況,重臨香港?不過今日情況同1975年相差好遠:當年無KYC,AML等規矩,到銀行開新戶口話咁易,帶齊證件到新加坡,加一封銀行介紹信例如花旗、美銀,親身到新加坡一次,就可以迅速開設ACU戶口,依家就煩到震,更何況受疫情限制,難以旅行㖭。以前亦可趁旅行美國之便,在三藩市唐人街美國銀行開設美元戶口,依家呢,美國銀行受反洗黑錢條例所限,着手清理久未有活動之外國人戶口,唔使事先通知,就寫番一張支票寄來香港畀你關閉戶口,支票銀碼正正等於戶口存款數目。

金融時報(12月22日)報導環球銀行(Global Bank)為了避免觸怒北京,有了港區國安法之後,正在靜靜雞於新加坡擴充,於香港收縮,據調查, Linkedin數據發現瑞銀及JP摩根大通在新加坡招聘數字,8倍於香港。高盛、瑞信、花旗之新加坡招聘,兩倍於香港。雖然為了中資IPO,世界級大銀行唔會因國安法而離開香港,但私人銀行、資產管理等業務,已開始陸續低調地轉移陣地去新加坡,疫情過後,會有好多人去新加坡一轉!

1557811557-016d87e205d8a1bdfbc7dd02b1301ea5
西貢 -胡志明市

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s