咖啡八卦 / 鍾長江

前幾日，咖啡茶水之餘，執到一篇與咖啡有關嘅文章，寄給侯老總，算係找咖啡數，喺佢間茶檯踎咗咁多輪，再唔放低多少碎銀，就顯得「黐飲」得太過了。

講起咖啡，凡係在西堤成長之人，幾乎個個都有咖啡癮，不但有，而且係十分大癮。一大早，如果冇杯咖啡落肚，便覺週身唔妥，唔只開工冇精神，重兼火氣大，成日揾人鬧交。連街頭阿婆賣嗰碗紅豆沙都𢳂少好多。

大約1954至 1960年前，南越剛獨立，又要安置成百多萬從北越南撤嘅難民，又要發展經濟，所以當時所謂嘆咖啡，比較簡單而同一，多數在街頭茶檯，伙計捧來之後，各自加糖。當年，其實連砂糖，尤其飲咖啡的白砂糖全係入口貨。慢慢飲，一邊吧啦吧啦打牙較，或者打開報紙，讀一輪，之後就與隔離枱各位「賢達人士」，交換心得，直到食完一碟點心，或一碗粉麵，飲完杯咖啡同兩杯茶之後，就一聲珍重，各奔前程 開工去也。直到晚飯後，又三三兩兩，重聚一堂，或報告日間所見所聞，或交換情報，又加兩杯茶水之後，各自找數，穿回木屐，互道晚安，明朝再見，便各自歸家安寢。周而復始，時光流逝，好寫意也。

後來戰爭爆發，越打越烈 (唔好問點解！)，但經濟亦有突破之發展。在中部高原，由南撤來的農民屯居，墾殖的農莊，亦成功地發展。年年豐收茶、咖啡，各種高原特產的蔬果，充斥市場，甚至出口。特別是咖啡與茶，是稻米和橡樛之後，出名的農產品。邦美蜀的咖啡，在國際市場上，大大有名。其中又以Mocca 咖啡最香。而越南由初步工業化而建設的各類工廠，亦已生產出足夠的民生必須品如白糖、紙張、玻璃以及各類布料，包括各合成纖維織成的布料，化工廠 ……等，人民生活水準亦大大提高，加以教育的普及，所以品味都唔同晒。

當然喇，有好嘢梗係先益自己人囉。所以連街角，路口的茶檯裏用布袋煮出來的唐人式咖啡都非常香，而每個茶檯聲稱係自己炒咖啡豆，各有秘笈。真至60年代中開始，戰亂頻頻 政局不定，又加緊徵兵，年青人日漸對前途不只失望，更加多的是迷茫，特別是對西方傳媒的「迷信」。此時也，音樂咖啡室便大行其道。越南人又素有嘆法國滴漏式咖啡的習慣，又有本土生産的靚咖啡。此類咖啡室專做年青人生意，店內裝飾甚有品味，而又有當年最新式的磁帶唱機，一卷帶可放幾小時，專播放反映當時社會的音樂，戰爭中的殺戮、生離死别、故鄉情、國家義。在戰場上，兄弟、朋友同伍之間的生死情義……這類訴說戰亂之苦的音樂，很多是由戰地軍人創作，那個年代的年青人，人人都可以「唱熟」幾首，特別是1968年，戊辛新年之亂之後 戰爭歌曲更是每音樂咖啡店必備。而咖啡亦越冲越靚了。

 大逃亡之後，流離失所的「南越船民」，在異地立足的同時，亦把這種坐在小木櫈上，邊嘆老式滴漏咖啡，邊聽忬情音樂的生活情趣帶到世界上去，越式咖啡店亦打響名堂 (按)，令很多人忘記了這種喝法的「來歷」了。

(按) 跟着「南越船民」，而揚名世界的，還有越南「麵包夾豬肉」、越南牛肉粉、越南春捲(生捲與炸捲)、越式咖喱牛肉、越南米碎飯(加豬皮絲撈抄米粉)，甚至唐人粉麵，及侯老大抔雪啡……而識食之人更中意係Kho豬肉(魚水滷豬肉)。

侯思傑：
哈哈哈，你搞錯嘞，長江兄，新會校友間茶檯係唔收錢，只係收稿 / 文章、圖畫同相片，總之放得上校網嘅嘢都收，但就係唔收錢。
飲「雪啡」只係初來香港，乜都唔識，所以先至會叫雪啡。原來香港係冇雪啡呢樣嘢，只會將飲品放入雪櫃冷凍，例如啤酒都係冷凍。但，越南以前就加嚿雪落去飲，或者係因為以前凍櫃唔普及。
講到咖啡，真係要好長篇大論先至講得完。例如你選嗰篇「布達佩斯」文章，搞到我好想寫翻篇，只係最近好忙，仲有8個星期，我齣劇就要演出，所以分唔到心。
聽你講，當年越南嘅咖啡店播音樂，我想起有一首好短嘅越南歌，只得分幾鐘，叫Vietnam。係一位美軍行軍時執到，之後帶返美國，1998年出版，由佢哋將呢首清唱嘅歌重新編曲，收錄喺張“Celestial – Spirit House ”CD裏面。
大家聽聽，聽完來茶檯打下牙較啦。