驚情半世紀 / 鍾長江

上集

有好多嘢，真係好似俗語話齋「越描就越黑」，但係有時如果唔「瞄」，佢重會黑過墨斗。

所以明知如果現在，再東聲明，西聲明，好容易成咗非洲和尚，踎臭定， 都要噏幾句。

呢幾行嘢， 我記過好似係先一排，因為私人介紹兩本關於越戰嘅書畀你，加埋在越南嗰二十多年嘅所見所聞， 故而一時谷氣， 順手就鼠咗呢個主題嚟用， 實在唔係對呢篇文章有乜意見。 事關美國佬在呢場仗中， 確係做咗好多鬼鬼鼠鼠唔見得人嘅嘢。所以如果我一時在私下鬧生晒，有令到作 “越戰的詭異" 的校友有任何不快，在此特別致歉！

但講番又講， 點解我會介紹嗰兩本書畀侯老「歹」，在踎茶檯，飲咖啡之後， 加壺淡茶私下再「巴啦巴啦」之際，會有咁大火呢？越戰都結束咗成 42年咯，本來都應該冇乜所謂「想當年」啲事後孔明嘅囉嗦啦。但係，事實上，呢場仗嘅結果，依然影响到每一個南越嘅唐人，無論還在越南生活與否。甚至依然影響到好多世人，嘅思想。
── 忽聞召集令，咁就理應先為「個」家，下回繼續巴啦。請恕鄙人則個 !

下集……(似結局)

所謂1968年代嘅反戰言論，至今天，四十幾近五十年後，各種，各類嘅呢啲論，嗰啲論依然横行世上，向世人投毒。而冇人冷靜，用心去探討吓，點解無端端會爆出塲咁嘅戰爭出嚟。1954，日內瓦會議係邊幾條友「隆重簽訂」，之後係百萬北越人南跑抑或南越人民往北「回歸」？在美國佬未插手之前，係唔係南越忽然黐咗線，無喇喇拉炮，操兵出去打北越？殺人放火掟炸藥包？所以畀個 「國際無産的革命運動」夾手夾脚，打到死無葬身之地呢？連帶嗰哋「反動嘅大毒草」嘅唐人都話要消滅埋，絕不手軟吖？抄家打資產，半夜入屋用衝鋒槍篤住，押晒一家老少去「新經濟區」嘅，係因乜嘢罪？

1966 Terrorist Attacks and Riots in SAIGON

在 50年代末就埋藏在各段公路上嘅地雷，爆死咗幾多個賣國賊，美帝嘅走狗 ？抑或全是升斗市民？哦，殘殺小民就叫解放革命，而追緝，搜捕班恐怖份子，殺人罪犯就係反動，賣國，係外國走狗，咁，用俄制機槍成披掃射處死，用「國産鋤頭」來鋤斷個頭，消滅手無寸鐵，甚至生葬嘅手無寸鐵平民，呢味嘢又叫乜？或者時髦啲，Update啲，叫做 ISIS係……馬 ？當年剿滅恐恐怖分子以保護人民就係錯，今日對班亂掟炸彈，恐襲嗰班自稱 「回教國」嘅怖死仔，立即就地正法，就人人拍爛手扳叫好，同樣動機，同樣行動，同樣悲慘嘅結果，點解唔同樣處理，乜嘢理論？

我兩個同學嘅死，並非稀罕事件，人人都有親身體驗，面對啲咁嘅慘劇，唔用自己個頭嚟諗，反去信嗰班踎喺「金字塔」裏便，吹足大麻，然後怱發奇想， 諗出嗰啲荒荒唐唐學說嘅 嬉皮「學究」。以前就話年幼無知，而家都白晒頭， 彎晒腰重係咁諗 ？？？

是以要大力拍茶枱，而麻麻聲也！

連杯茶都苦到飲唔落口！

侯思傑：
喂，大哥大，你好似喺度鬧緊我噃？
冇錯，嬉皮我做過、草我亦對過，反戰歌隻隻唱得朗朗上口；羅素、沙特、存在主義……哲學，當年讀得如癡如醉，仲有捷古華拉嘅名言「當死亡來到時，擁抱佢」，好鬼死浪漫，好似同vampire擁抱咁，直程係驚情400年。
不過，常言道：30歲之前浪漫確係浪漫；30歲之後仲繼續浪漫，咁就夠曬戇居嘞。
所以，我30歲之後，理性回歸。十足十《俏郎君》(“The Way We Were”)裡面嘅羅拔烈福。
所以，冇所謂啦，任你鬧啦，反正你鬧嘅係30歲之前嘅我。

鍾長江：
哎吔！匪是，匪是！
我真係唔知你老兄嗰啲令人「幾度徘徊」嘅往事。唔覺意得罪晒 ！勿怪勿怪 ！
事實上，60年代中期，你講嗰幾個哲學 … 人，個個後生仔都耳熟能詳，人人都可以隨口噏幾句，但多數都止於噏幾句念口枉，出吓風頭而已。而在我哋呢班由北越南撤入南圻嘅後生裏面，就好少有邊個識得欣賞佢哋。 無他，因為唔好彩，好細個時就有自身嘅經歷也。 佢逼住你在面對各種變幻難測嘅問題，情況前，只相信自己嘅分析，無論得出對或錯嘅結論，而且得出自己認為係合理嘅結論之後，非常硬頸，唔多肯聽人講。
所以，唔好講嗰啲時尚嘅哲學，就連嗰陣時啲流行歌曲，影片我都好少睇。反而描寫戰爭，動亂中，人們所受嘅各式各樣嘅苦難、歌曲、影片、小說就睇好多。呢啲唔知係禍或係福，對或錯。但到咗今日，回頭睇番，都唔算好錯。
當時我哋啲所謂，幻想，希望其實好庸俗，粗鄙，一 啲都乜叫做「理想與抱負」，只係希望戰爭早結束，讀好書， 揾份工，娶個老婆，生幾個豆釘，買間唔漏水嘅屋，唔洗捱餓，安安定定過一世，就好滿足架嘞！