粵語 – 有著深厚歷史文化 / 朱一心

編者按:以下這篇文章是香港資深記者兼作家朱一心女士傳來給我。由於我一向堅持用「國語」來稱呼我們的語文,絕不叫「普通話」,尤其在新會學校校友的網誌,我更要堅持這一點。但,由於這是一篇記述文章,我不能矯枉過正的將「普通話」強行改成國語,否則會變得不真實。希望讀者明白。

粵

前陣子在廣州一個飯局認識了一個川音畢業的湖北妹。閒聊間,我問她:妳來廣州都5年了,怎麼一句廣東話都不會說?

她:身邊沒朋友說粵語,而且粵語也沒什麼好學的。

我問:此話怎說?

她說:大家都講普通話就好了,像粵語這種比較沒文化的方言,都快被邊緣化了,學它幹啥呀?學來有啥用呀!……

作為一個講了幾十年粵語又叫讀過下書的香港人,我對他說的當然是不以為然。我問:言下之意,你是覺得說普通話比粵語有文化有內涵?

她說:可以這麼說!

我笑著說:很好很好,作為湖北人,又是中原地區的中國人,你熱愛中國的文化麼?

她:當然熱愛了!

我:那你認為琴棋書畫、四書五經、唐詩宋詞…這些能代表中國的優秀文化麼?

她:可以。

我:你剛說你熱愛中國文化,那你瞭解唐詩宋詞麼?

她:一點點。

我:那你能隨便諗幾首唐詩宋詞出來聽聽麼?

她:其實我也不太瞭解,但我是有聽說過唐詩宋詞,我大概知道是什麼回事。

我笑說:好吧,我知你應該是跟絕大多數人一樣不瞭解的,不然你又怎會不知道距今已有1300年歷史的唐詩宋詞;其實大多數是用現今的所謂粵語寫成,用粵語才能讀得通順的呢?

她:吓?不是吧!唐詩宋詞那些不是用普通話來諗的麼?

我笑說:1300年的唐代根本就還未出現現在所謂普通話,普通話是大概500年前北方蒙滿胡語雜交變種流傳至今的語言,不管詞彙、用詞、都比歷史久遠的廣東話單薄粗疏多了。如果你說熱愛中國的文化,不是對人吹水唬弄的話,你就應該學好廣東話,不然你看很多古籍和諗唐詩宋詞就會看不懂讀不通。明白了麼?

例如蘇軾:「寧可食無肉,不可居無竹,無肉令人瘦,無竹令人俗,人瘦尚可肥,士俗不可醫」的【食】字和【肥】字,正是廣東話。日常例子如~食餸、食嘢、好好食、肥仔、肥佬、肥騰騰。普通話唔係用「食」,係用「吃」,唔係用「肥」,係用「胖」。

再舉例,李白:「人生得意需盡歡,莫使金樽空對月」的【樽】字,正是廣東話。日常例子如~買一樽豉油返屋企、飮番樽啤酒先、呢個玻璃樽入面係乜嘢來咖?普通話唔係用「樽」,係用「瓶」,一瓶、瓶子。

至於詩経:「行行重行行,與君生別離」的【行】字,正是廣東話。行行重行行的意思是;行下,停下,再行下,又再停下,非常之依依不舍……廣東話日常例子如~行路、行街睇戲、行出去、行花市、行咗幾遠呀?普通話係用「走」或「逛」,走路、逛街。

還有杜甫:「朱門酒肉臭,路有凍死骨」的【凍死】,正是廣東話。廣東話日常例子如~好凍、凍冰冰。普通話唔係用「凍」係用「冷」。李白:「舉頭望明月,低頭思故鄉」的【望】字,正是廣東話。廣東話日常例子如~望住前面、唔好四圍望、望乜嘢?普通話唔係用「望」係用「看」。杜甫:「肯與鄰翁相對飲,隔籬呼取盡餘杯」的【隔籬】,正是廣東話。廣東話日常例子如~我就住喺你隔籬、隔籬鄰舍、搬過隔籬屋。普通話唔係用「隔籬」係用「隔壁」或「鄰居」。李煜的「問君能有幾多愁?恰似一江春水向東流」的【幾多】,正是廣東話。廣東話日常例子如~幾多錢?幾多個?普通話唔係用「幾多」係用「多少」。

還有很多很多例子,不多說了,有興趣自己去查找答案吧!

粵語,有著千幾年深厚歷史文化基礎,係傳承中華古代文明的載體,推普冇問題,但倡議廢粵、貶粵、打壓粵語;絕對是破壞中華文化傳承的文盲行為。還有,敬告各位,唐詩真係要用粵語來讀先至啱,如果自己不懂粵語,冇文化就算了,千萬別隨便亂說別人講粵語是冇文化,真係會失禮死人。

pimg_549

 

 

朱一心  (資深記者 / 專欄作家 / 作家 )

新作:《我在一個人的生活》/ 翻譯:《黑暗之城》

 

17 Comments

  1. 至於詩経:「行行重行行,與君生別離」的【行】字,正是廣東話。行行重行行的意思是;行下,停下,再行下,又再停下,非常之依依不舍……廣東話日常例子如~行路、行街睇戲、行出去、行花市、行咗幾遠呀?普通話係用「走」或「逛」,走路、逛街。(引)
    行行重行行 : 其實就係廣東兒歌中嘅 : 行行吓, 行到街執個橙,橙好食, 路好行 .—- 其中嘅 “行行吓“ 一樣意思. 漢語是單音語, 所以音域非常有限, 唔似複音語咁多變化, 只係喺個字尾再加一個音就成咗一個新字,就有另一個意思.所以漢語要有聲, 以示唔同嘅字.而因為文化跟住社會嘅發展亦變得多樣化,文字因此亦需要發展.但受到單音的限制,雖有多聲俾唔同嘅字, 都依然唔夠, 就要用到複合名詞呢味嘢嚟補充.此所以今漢語多複合名詞而古漢語少嘅原因喇.北古佬喺佢個黨嘅養育之下,以夷為漢, 張一切智識同價值都顛倒哂, 以奴為主,以無知當文明, 啋佢都儍 !

  2. 口痕痕又手痕痕, 試吓吹吓鄙人一啲大話 :
    廣東話, 當然以廣府話為正宗. 但在廣東這塊百粤之地, 有成百種語音, 或曰 :方言. 單就我故鄉鶴山一地,可以講可以話每鄉每村啲話都唔完全相同, 卻又 ”字字有來歷”, 自唐,宋戰亂帶來大批難民, 使得粤語更豐富, 多姿多彩. 最犀利係這些不同的古中原口語,雖然已經同本地粤語結合, 但主要語音依然能保存,令到廣東話特別豐富, 既有古漢語又有粤(越)語特色.而且到今日, 廣東人,特別係離鄉別井嘅廣東人, 依然自稱係 唐人, 講嘅係唐話,着嘅係唐裝或唐衫,讀嘅係唐書, 住埋喺唐人街.皆因佢地係唐朝嘅遺民是也 ! 呢種只稱宗族而唔稱國族嘅文化, 正正是古漢族嘅文化特徵嚟 !孔子自稱魯人, 項羽自稱楚人,連詩仙李白都話 : 我本楚狂人…咁話喎 !
    冇晒啤酒, 請暫停.

      1. 李白嘅身世其實都唔係好清楚, 可能因為當時重未有報生紙呀或者戶口紙之類嘅行政紙張, 亦冇相片可以睇出佢嘅膚色, 五官等係邊度人. 哈哈… 不過如果佢真係由印度嗰邊移民過嚟楚地, 咁就証明唐朝真係好好嘢, 能令四夷來自願歸化, 重寫詩寫到千年之後依然天下第一, 就算佢嘅DNA真係亞差, 我諗所有中國人都唔制過佢, 就算要打Doping都一定話實佢係唐人啦! 哈哈哈….但係我就好懷疑, 都唔知佢有咗綠卡未 , 見佢唐詩寫得好, 啲唐朝官民就認親認戚 話佢係 ”自己人”! 重唔俾人知佢係阿差添 ! 我諗, 為咗感謝呢位偉大嘅詩人, 從今以後好應該唔好再叫人地做亞差,亞差咁歧視, 而應該改口叫做 : 李白嘅同胞嘅後裔. 以示尊敬.
        係唔係 ?

    1. 叫「阿差」都唔係歧視。我嚮香港接觸的南亞裔人,佢地唔介意人地叫佢地做「阿差」。可能因為讀音問題而覺得係歧視。同係「差」,佢地就叫「阿叉」,警察就叫「猜」。
      以前在衙門做事的叫「差人」(讀音:猜人),而香港叫「公安」做差人。後來英國人引入日本文「警察」代替「差人」之後,都冇乜點改變,仍然有好多人叫警察做「差(猜)人」,警察亦經常叫自己做「猜人」。
      不過,你叫佢地做「李白既同胞既後裔」,我覺得太長,就咁叫李白就算啦,又或者叫「阿白」都好架,反正佢地咁黑。

      1. 哈哈哈哈…., 重話唔歧視 ?
        第一 , 人地只不過生得唔係咁白淨唧, 都唔洗要用到反諷嘅字眼嚟叫佢哋做”阿白”咁隂功吖 !
        第二, 如果週街叫人做 阿白喎, 俾啲新會佬聽到, 以為係叫佢, 就會應口 : 乜嘢事呀 ? 世侄! — 咁就真係蝕哂俾佢.
        有此兩個理由, 所以萬萬不能叫佢哋做 “阿白”.更不可用詩仙個字號嚟叫 :“太白”,不如用佢嘅綽號 , 叫佢哋 “謫仙同胞”,又親切, 又可以表示出自己都有多少”漢文化嘅底 ! ! 識得唐詩喎 !
        係耶? 唔係耶?

        Liked by 1 person

  3. 睇過鍾長江的回嚮,我打電話給侯思傑問鶴山話,佢話佢完全唔識鶴山話,而且亦未去過鶴山。我即刻話你有冇攪錯呀?自己鄉下到未返過去。佢話有咩咁出奇呀,佢話佢唔單止係賣國賊,仲係賣鄉賊。嘩,咁佢嘛好發?不過,我上網發現有一段鶴山的片,幾好,同大家分享.
    廣東五邑地區 鶴山各地方音: https://www.youtube.com/watch?v=QzK9mAnZMao

    1. 在新會學校正對面,是一條丁字巷,成橫巷後還有一條巷,這三條大巷,一直兩横,很多新會同學都住在其中. 在學校正對面, 打鐵鋪隔離,是一條直巷,名叫“燙弄“ 因為每間屋的大門前都有一度可“燙出燙入“的木閘, 有門檻, 屋頂有鑲玻璃的天窗, 是真正的“唐山鄉下“的古老 “石屋“格式. 直巷盡頭是第一條橫巷,左轉是堀頭巷,聽說以前可以通到街黃合利雜貨鋪後面,後來封了. 右轉真通梅春賞街,對面近一家卟卟齋.– 以前有一個時期李熊老師住在這條巷,就在這横巷,距右轉約二十多公尺,有一條小通道,長約二十多公尺,通到第二條横巷.這條巷右邊直出經過一個栅門,也通出梅春賞街,近河邊.另一頭,穿過一個“村口“,是一片大空地,在一棵十多人合抱的大榕樹下有一個小小的土地廟,再前行直出黎光賢街, 這是一條標準廣東鄉村的格局,因為居民大部分是鶴山人,所以就叫做鶴山村.一入“村“,耳中盡是鶴山口音. – – – 都可算是學習鶴山各種方音嘅地頭.

      1. 嘩,鍾長江,你又幾好記性噃。我記得李熊老師喺學校對面條巷嗰度住過。
        不過,那年那月,我嘅焦點多放在女同學,好少放在其他囉。
        記得有位女同學叫紀秋華嗎?她住在平西那邊的一條巷子的,升上四年班,她沒繼續讀,有說是去了義安學校。
        每次跟劉鳳娥通電話,她一開聲第一句「搵到嘞,秋華喺瑞士 / 澳洲 / 紐西蘭 / 英……」

  4. 鍾長江講的那間卟卟齋不就是劉校長主理的育才學校嗎?原來 鍾、侯兩位校友都是原籍鶴山?那麼大家都是 heh San lá ,這就是[鶴山佬]的正宗鶴山話發音吧?我不敢肯定.
    至於主文討論的粵語文化,是不爭之論,理據充分,無可置疑.至於[煲冬瓜],粵人夏天感覺熱氣,為防生病就會想到[煲冬瓜],解解暑,功用僅此而已!

    1. 基炳兄:
      雖說我是鶴山人,但,我對鶴山幾乎一無所知。唯一知道的是,以前鶴山生產的被子是全國有名,不過我還是在前兩年才買來蓋。
      另外還有麵豉醬,據說也很有名,我阿爺最喜歡食麵豉蒸豬肉。
      早年在廣東省置業,沒選鶴山,選了東筦的樟木頭。
      同學劉德明每次來港,跟著便回鄉祭祖及探望鄉親。每次他回鄉前,都會「訓斥」我忘祖。劉德明是我媽媽的契仔,唉,我是他的契弟。
      要認親認戚,我想應該去認一個在香港富豪,他是馮國經,是鶴山人。在香港,他的財富雖不及李嘉誠,總算是在富豪榜上的前列。可惜自己生性喜歡「巴結才人」,所以年到70,仍然窮人一名。

  5. 講起嚟都算是童年往事, 打功夫有話 “一甲子功力”,而圍繞住新會學校 (但有好多學生係鶴山 “喇契”)同平西區,可以講係我地(至少我係咁!)所有 “人生經驗”中好重要嘅背景,一甲子前之各種瑣碎往事, 現在成了不止是 班“老嘢”的”污哩單刀”嘅回憶, 而且成咗對自己仔女講故事的題材, “舊陳時喎 ….”就是一貫嘅開塲白 !!
    話說紀秋華同學, 其實點只係侯老兄一個人幾十年都縈繞心頭呢 ! 我讀四年班時,住喺黎光賢街, 近保家行, 好多時都都見佢在黄合利前面經過, 好似係轉右去黎光賢街,出”海皮”, 過橋去對面”海”,森舉嗰邊. 有好多對眼, 望到實, 用目光嚟伴住佢嘅腳步, 漸行漸遠,真至芳蹤渺渺都重喺度頭岳岳,一班儍佬咁 !當年我剛啱 10 歲, 豆釘咁細, 只知佢好靚!係新會學校有名嘅靚女 … 之一.
    係咁, 講住咁多先 !
    黃基炳學長講那間卟卟齋,究竟叫乜名,我真係唔寄得, 只知佢嘅教材重有 „三字經“ (唔係粗口!). 講起煲冬瓜,有冇解暑功效就要問過”阿媽”先正知. 但係外號叫做煲冬瓜嘅所謂普通話,當年老師教我地話係國語, 即係中國嘅官方語言咁話.係每個中國人都應該識講正好. 當時有陳章卿,陳達卿兩位老師教,正宗北平音, 非常文雅. 我記得, 有一次,教讀 : 鞠躬兩個字 – 同豬公同音, 後便有幾個大嘅同學笑咗出嚟, 結果當然係下塲悲慘啦!陳章卿老師重係國畫名家.我班有個同學,畫畫非常有天份, 佢嘅畫好得陳生欣賞, 所以我地班叫佢做阿八大, 即係話佢似八大山人咁,唔只因為佢畫畫靚, 重因為佢好爛喊,正係林紹鈞講八大山人呢個外號嘅來由.
    人老嘴碎, 一提起 :舊時咯喎,… 就雞叮唔斷.就此收口 !

    1. 摘自我20年前的小說《風暴前線》:

      「告訴我你的初戀故事吧。」君嫘微笑著說。
      許久,聽不見智仁的聲音,君嫘轉頭望過去,智仁像個孩子般的皺起眉頭來,
      好像難以啟齒的說:「我沒有初戀過。」說著把手放在頭上輕梳了幾下,當他看
      到君嫘流露懷疑的眼神時,他迫不得已訥訥的說:「我只有單戀,可沒有戀愛過。」
      「單戀?啊!快告訴我那是怎樣的滋味!」君嫘好像很興奮的縮回伸直的雙
      腿,側著身子靠在石凳上看著智仁,等著他娓娓道來。
      過了一會,智仁還是那樣難為情,於是她引導性的問:「她姓什麼?叫什麼
      名字?」
      「紀秋華。」
      「很漂亮的名字啊!我想她的樣子跟她的名字是一樣的漂亮,快說,是怎樣
      開始的?」
      「…那是一九

    2. 我好中意你的描述,好有影像感:
      有好多對眼, 望到實, 用目光嚟伴住佢嘅腳步, 漸行漸遠,真至芳蹤渺渺都重喺度頭岳岳,一班儍佬咁 !
      但,一點也不傻!

      1. 哈哈哈哈… 識得 “及”靚女 當然係唔儍啦 ! 點只呢班目光如電嘅阿哥唔儍, 連當時重係一班豆釘, 我地都覺得佢係靚得好交關添 ! 所以人人都企定定,所以有啲似儍所哋.
        其實我咁樣描述嗰班頭岳岳嘅青年, 都係因為睇得多嗰啲 文藝小說, 學壞咗師 ! 所謂 : 看着天上的浮雲, 感觸萬千, 覺得它們好像屋後大坑渠 飄浮的垃圾, 蒲吓….蒲吓, 漸漸消失…
        攪到依家全身都起晒雞皮 ……哈哈哈哈…

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s